Кина го разреши министерот за одбрана, генерал Ли Шангфу, кој речиси два месеци не се појавуваше во јавноста без никакво објаснување, објавија денеска државните медиуми.
Ли е вториот висок кинески функционер кој исчезна од очите на јавноста оваа година, по поранешниот министер за надворешни работи Чин Ганг, кој беше сменет од функцијата во јули без објаснување.
Ли, кој стана министер за одбрана за време на реконструкцијата на владата во март, не е виден од неговиот говор на 29 август.
Нема индикации дека исчезнувањето на Чин и Ли сигнализира промена во надворешната или одбранбената политика на Кина, иако тие покренаа прашања за издржливоста на кругот на моќ на претседателот и лидер на владејачката Комунистичка партија Си Џинпинг.
Тој беше под санкции на САД
Си има репутација дека ја цени лојалноста пред се друго и немилосрдно ја напаѓа корупцијата во јавниот и приватниот живот, пишува Асошиејтед прес.
Критичарите веруваат дека тоа е всушност метод за елиминирање на политичките ривали и зацврстување на политичката позиција во услови на влошување на економијата и растечките тензии со САД околу трговијата, технологијата и Тајван.
Ли е под американски санкции поврзани со неговиот надзор над купувањето оружје од Русија, поради што му е забранет влезот во САД.
Кина ги прекина контактите со американската војска, главно во знак на протест поради американската продажба на оружје на Тајван, но исто така силно имплицира дека Вашингтон мора да ги укине мерките против Ли, што Пекинг одби јавно да го признае.