Најмалку две лица загинаа во силен земјотрес со јачина од 6,1 степени според Рихтеровата скала на островот Суматра во Индонезија, а земјотресот е почувствуван и во Сингапур и Малезија, соопштија денеска властите.
Директорот на владината агенција за ублажување на катастрофи, Сухарјанто, изјави дека најмалку две лица загинале, а некои згради, вклучително и владината канцеларија, куќи и банки, се оштетени, пренесува Ројтерс.
Земјотресот, за кој се вели дека нема потенцијал да предизвика цунами, ги принуди луѓето да ги напуштат објектите во некои области, вклучително и градот Паданг во Западна Суматра, а евакуација имаше и во Малезија.
Индонезиската геофизичка агенција BMKG претходно објави дека јачината на земјотресот била 6,2 степени според Рихтеровата скала, пренесе Ројтерс.