Претседателот на Русија, Владимир Путин, денес во Кремљ го прими специјалниот пратеник на Белата куќа, Стив Виткоф.
Според извештаите, на состанокот присуствува и помошникот на Путин, Јуриј Ушаков.
Американскиот дипломат и специјален пратеник на Доналд Трамп пристигна во Москва во среда наутро. Ова е негова петта посета на Русија од почетокот на годината.
Виткоф беше пречекан на аеродромот Внуково од страна на раководителот на Рускиот фонд за директни инвестиции и специјалниот претставник на рускиот претседател за економска соработка со странски земји, Кирил Дмитриев.
Да потсетиме дека посетата на Виткоф треба да ги одреди понатамошните чекори на Вашингтон кон Москва.
Американскиот претседател Доналд Трамп изјави дека ќе донесе одлука за притисок врз Русија и нови санкции по посетата на Виткоф на Москва.
„Ќе видиме што ќе се случи. Потоа ќе ја донесеме оваа одлука“, изјави американскиот претседател во вторник.
Еден ден пред најавената посета на Виткоф, Трамп разговараше по телефон со украинскиот претседател Володимир Зеленски за потенцијални санкции против Москва, според луѓе запознаени со разговорот.
Во извештајот од состанокот објавен на социјалните мрежи, Зеленски рече дека санкциите би можеле „многу да променат“ кога станува збор за руската економија.
Да потсетиме дека на 14 јули, Трамп ѝ даде на Русија ултиматум од 50 дена за мировен договор со Киев, кој подоцна го намали на 10 до 12 дена.
Тој нов рок истекува во петок. Доколку не се постигне договор, тој се закани дека ќе воведе стопроцентна царина за увезената стока од Русија, како и секундарни санкции за земјите што купуваат нафта, гас и други енергетски производи од Русија.