Стотици луѓе се собраа во петокот вечерта на плоштадот Дам во холандскиот град Амстердам против победата на екстремно десничарската Партија за слобода (ПВВ) на Герт Вилдерс на изборите одржани на 22 ноември, јавува Anadolu.
Екстремно десничарската, антиисламска ПВВ победи на општите избори во Холандија, а нејзиниот лидер изјави дека тие повеќе не можат да бидат игнорирани.
Демонстрантите изразија загриженост поради подемот на екстремно десничарската и исламофобична партија на Вилдерс ПВВ, која освои 37 пратенички места.
Во обид да ја ублажи својата претходна реторика, Вилдерс во изјава за јавниот радиодифузен сервис НОС ја изрази својата желба да биде премиер за сите, без разлика на етничкото потекло или религијата.
Тој изрази надеж дека би можеле да постигнат договор во коалициските преговори со другите партии.
Во претходните години партијата ПВВ во својата партиска програма ветуваше дека ќе ги затвори џамиите во земјата, ќе го забрани Куранот и ќе ги укине дозволите за престој на барателите на азил.