Федералната голема порота го прошири обвинението против Џек Тешеира, млад војник осомничен дека објавил голем број тајни документи на интернет, вклучувајќи го и оној за војната во Украина, што го стави Вашингтон во непријатна положба.
Големата порота со седиште во Бостон го обвини по шест други точки од обвинението за намерно задржување и пренесување на информации означени како важни за националната одбрана, од кои секоја носи до десет години затвор.
Во САД, големата порота е комисија составена од граѓани со обемни истражни овластувања.
Тој има само 21 година
Млад регрут на американската Воздухопловна национална гарда, кој има 21 година, во април беше обвинет за неовластено задржување и пренесување информации поврзани со националната одбрана и неовластено земање и чување на доверливи документи и материјали, за што е предвидена казна од десет, односно пет години затвор.
Министерот за правда Мерик Гарланд рече дека ќе бара многу строга казна за него.
Тој е обвинет за објавување доверливи информации на социјалната мрежа Дискорд како специјалист за ИТ и комуникации во базата Кејп Код, во близина на Бостон, кои подоцна се проширија и на други социјални мрежи.
Тајните документи ја откриваат загриженоста на американското разузнавање за изводливоста на украинска контраофанзива против руските сили.
Тие исто така наведуваат дека Вашингтон собира разузнавачки информации за своите најблиски сојузници, вклучувајќи ги Израел и Јужна Кореја.
Случајот го стави Вашингтон во непријатна позиција и покрена прашања за можни слаби точки во безбедноста, бидејќи младиот војник, и покрај неговиот понизок чин, имал пристап до чувствителни информации.