Израел и Хамас денеска започнаа четиридневен прекин на огнот во Појасот Газа, прва пауза во 48-дневната војна што ја опустоши палестинската енклава, а засега нема извештаи за гранатирање, артилериски или ракетни напади.
Примирјето, кое започна во 7 часот наутро по локално време, вклучува сеопфатен прекин на огнот во северниот и јужниот дел на Газа, ослободување на 13 израелски жени и деца држени како заложници од милитантите подоцна во текот на денот и прилив на помош во опколената енклава.
Во замена ќе бидат ослободени голем број палестински затвореници кои се чуваат во израелските затвори.
Дописникот на Ројтерс во близина на северниот дел на Газа не слушнал никакви активности на израелските воздушни сили и не видел никакви траги кои обично остануваат од палестинските ракетни лансирања.
Либанската телевизија Ал-Мајадин јави дека од почетокот на прекинот на огнот во Газа не се слушаат звуци од бомбардирање.
Сирени на југ, борбите траеја до почетокот на примирјето
Сирени се огласија во две израелски села надвор од јужниот дел на Појасот Газа, предупредувајќи на можен палестински ракетен напад.
Сепак, нема потврда за какво било лансирање.
Борбите продолжија неколку часа пред прекинот на огнот, а официјални лица во енклавата управувана од Хамас изјавија дека една болница во градот Газа била меѓу целите на бомбардирањето.
Двете страни, исто така, сигнализираа дека паузата ќе биде привремена пред да продолжат борбите.
Индонезиската болница беше под немилосрдно бомбардирање, работејќи без светлина и полна со стари луѓе и деца премногу слаби за движење, рекоа здравствените власти во Газа, контролирани од Хамас.
Ал Џезира го цитираше Мунир Ел Барша, директор на Министерството за здравство на Хамас во Газа, кој вели дека пациентот, ранета жена, е убиена, а уште тројца се повредени.
Повеќе помош требаше да почне да тече во Газа, а првите заложници, вклучително и постари жени, треба да бидат ослободени во 16 часот.
Вкупниот број на ослободени заложници треба да биде 50 во текот на четири дена, изјави во Доха портпаролот на катарското Министерство за надворешни работи, Мајед ал-Ансари.
Доаѓаат камионите со гориво
Новинската агенција Шехаб, која е поврзана со Хамас, објави дека камионите со гориво почнале да влегуваат на преминот Рафа по почетокот на прекинот на огнот.
Египет соопшти дека 130.000 литри дизел и четири камиони гас дневно ќе бидат испорачани во Газа по почетокот на прекинот на огнот и дека 200 камиони со помош ќе влегуваат во Газа дневно.
Се очекува Палестинците да бидат ослободени од израелските затвори, изјави за новинарите портпаролот на Катар.
„Сите се надеваме дека ова примирје ќе доведе до можност да започнеме поширока работа за постигнување трајно примирје.
Хамас на својот канал Телеграм потврди дека сите непријателства на неговите сили ќе престанат.