Јужнокорејската влада ја изрази својата континуирана посветеност на мирот и дијалогот, откако Северна Кореја изјави дека не гледа причина да соработува со Сеул под водство на новиот претседател Ли Џе-мјунг.
„Воспоставувањето мир, состојба во која нема потреба од конфликт, е цврста филозофија на администрацијата на Ли Џе-мјунг. Владата постојано ќе презема неопходни мерки за создавање Корејски Полуостров без непријателство или војна“, изјавија од кабинетот на јужнокорејскиот претседател за NK News.
Ли Џе-мјунг ја истакна важноста од враќањето на довербата со Северна Кореја и создавањето мирна атмосфера.
Ли го изјави ова за време на презентацијата на писмото за назначувањето на новиот министер за обединување на двете Кореи, Чунг Донг Јунг, објави новинската агенција Јонхап.
Изјавата дојде откако Ким Јо-Џонг, сестрата на севернокорејскиот лидер Ким Џонг Ун, ја отфрли можноста за разговори со Југот, нагласувајќи дека „нема што да се седне или да се разговара со Јужна Кореја“.
Таа, исто така, ги отфрли неодамнешните мировни гестови на Сеул како неискрени, обвинувајќи ја администрацијата на Ли дека се обидува да изгледа морално коректна или да привлече глобално внимание и јасно стави до знаење дека Северна Кореја сè уште го смета Југот за „непријател“.
„Важно е да се обнови довербата меѓу Јужна и Северна Кореја, а воедно да се вложат напори за градење мир“, рече Ли.
Коментарите на Ким Јо Jонг беа првпат Пјонгјанг да издаде официјален став во врска со новата јужнокорејска администрација.
Како одговор, Министерството за обединување на Сеул нагласи дека нема да биде поколебано од изјавите на Пјонгјанг.
„Нема да претеруваме со реакциите на изјавите на Северна Кореја“, рече портпаролот на министерството, додавајќи дека напорите за враќање на мирниот соживот на полуостровот ќе продолжат на мирен и доследен начин.
Хан Ки-хо, професор на Институтот за обединување Аџоу, изјави за NK News дека изјавата од понеделник го претставува официјалниот став на Северна Кореја и дека Јужна Кореја „моментално нема ефективна моќ“ да го промени.
„Би било мудро (за владата на Јужна Кореја) да го задржи сегашниот став за мир и соработка на Корејскиот Полуостров, а воедно да создаде поволна надворешна средина за дијалог, да спречи случајни конфликти и да ја минимизира штетата врз односите со САД во услови на тековните трговски преговори меѓу Јужна Кореја и САД“, рече тој.