Повеќе од половина од возрасните во Европа се дебели, според Регионалниот извештај за дебелината за 2022 година претставен од Светската здравствена организација (СЗО) во вторникот.
Податоците покажуваат дека околу 59 отсто од возрасните во европскиот регион на СЗО се со прекумерна тежина или дебели.
Проблемот погодува повеќе мажи отколку жени, при што 63 отсто од мажите се со прекумерна тежина во споредба со 54 отсто од жените.
Кај децата на возраст меѓу 7 и 9 години, 29 отсто од момчињата се со прекумерна тежина или дебели, а 27 отсто од девојчињата се со прекумерна тежина.
Само 8 отсто од децата на возраст под 5 години се со прекумерна тежина. Кај адолесцентите овој процент е 25.
Зголемување на дебелината кај децата и адолесцентите
Луѓето со прекумерна тежина и дебели биле несразмерно погодени од Ковид-19 за време на пандемија и имаат поголема веројатност да бидат примени во болница или да умрат од болеста, според СЗО.
Првичните податоци, исто така, сугерираат дека дебелината кај децата и адолесцентите е во пораст поради пандемијата.
Прекумерната тежина и дебелината генерално се меѓу водечките причини за инвалидитет и смрт во Европскиот регион на СЗО, а дебелината може да стане главен фактор на ризик за рак во наредните децении во некои земји, заменувајќи го пушењето.
Ниту една земја нема да може да го запре порастот на дебелината до 2025 година, тврди СЗО
Дебелината може да доведе до рак, хронични респираторни заболувања како што се астма, мозочен удар и други кардиоваскуларни заболувања, проблеми со црниот дроб и бубрезите, болки во грбот и проблеми со менталното здравје.
Проценките сугерираат дека прекумерната тежина и дебелината во моментов се четврти најчест фактор на ризик за незаразни болести во регионот, по високиот крвен притисок, ризиците од исхраната и тутунот, се вели во извештајот.
Европскиот регион на СЗО се состои од 53 земји, меѓу кои Турција, Русија и Украина надвор од ЕУ.
Ниту една од земјите не е на пат да ја постигне целта за запирање на порастот на дебелината до 2025 година, според СЗО.