Агенцијата за храна и ветеринарство (АХВ) потврди појава на болеста сипаници кај овци и кози во општина Куманово, по што се воведени итни контролни и заштитни мерки на терен.
Првиот позитивен случај бил регистриран на 27 јануари 2026 година, по што случајот веднаш бил пријавен во европскиот систем ADIS и во системот WAHIS на Светската организација за здравје на животните (WOAH), согласно процедурите за болести од Листата А на Европската Унија.
Според официјалното Решение за контролни и заштитни мерки со архивски број 10-444-4 од 05.02.2026 година, околу зафатените одгледувалишта во селото Лопате е воспоставена заштитна зона од 3 километри и зона под надзор од 10 километри.
Во овие подрачја се спроведуваат засилени контроли, движењето на животните е строго регулирано, а сточарите се навремено информирани преку ветеринарните друштва и Ветеринарната комора.
Дополнително, на 30 јануари и 2 февруари биле потврдени уште две жаришта во Лопате.
Сите заболени животни од трите одгледувалишта се нештетно уништени и закопани, во согласност со пропишаните биосигурносни мерки.
Забрана за пазари и јавни настани
Со цел спречување на ширење на болеста, АХВ ја забрани работата на сите добиточни пазари во државата за приемчиви животни, како и одржување изложби и спортски настани со ваков вид добиток. Исклучок е дозволен само за транспорт на животни кон одобрени кланици.
Во однос на млекото, суровото млеко од заштитните зони може да се пушти во промет исклучиво по термичка обработка – пастеризација на 72°C во времетраење од 15 минути, било на самото одгледувалиште или во одобрен објект.
Надвор од рестриктивните зони, млекото може да се користи без дополнителни ограничувања.
Албанија воведе забрана за живи животни
Досега, официјална забрана за увоз и транзит на живи овци и кози од Македонија воведе само Албанија.
Забраната се однесува и на герминативни производи, кожи, волна и влакна, но не и на производи од животинско потекло, што значи дека извозот на јагнешко месо во Европската Унија и регионот не е доведен во прашање.
Во регионот, болеста е широко распространета – во Грција се регистрирани 1.532 жаришта, во Бугарија 129, а во Србија три.
Инкубацијата трае 21 ден
Од АХВ посочувајќи дека според стандардите на WOAH и европската легислатива, инкубациониот период на болеста изнесува 21 ден од контакт со заразено животно.
Институцијата нагласува дека не е надлежна за формирање на цената на јагнешкото месо, туку за обезбедување здравствен статус на животните преку издавање ветеринарно-здравствени сертификати, со што се олеснува извозот.
Во меѓувреме, Агенцијата работи и на исплата на заостанатите обврски кон ветеринарните друштва, паралелно со справувањето со оваа и други новопојавени болести кои не биле предвидени во годишната програма за здравствена заштита.
Надлежните апелираат сточарите строго да ги почитуваат мерките, со цел навремено локализирање и сузбивање на болеста.
Никола Ивановски