Поставена e спортската опрема во новата училишна спортска сала на средното стручно училиште „Наце Буѓони“ во Куманово, информираа денеска, надлежните од училиштето.
Училишната сала е опремена со современи реквизити наменети за кошарка, фудбал, одбојка, ракомет, гимнастика.
– Сè е завршено, поставени се сите реквизити за квалитетно одвивање на наставата по физичко образование. Салата е модерно опремена со современи реквизити, изјави директорот на училиштето, Драган Јаневски.
Спортската сала е изградена со средства обезбедени преку Владата во вредност од 27 милиони денари, а општина Куманово учествува со 1,5 милиони денари.
Салата ќе ја користат околу 2.000 ученици од „Наце Буѓони“ кои следат настава на македонски и албански наставен јазик. Училиштето прв пат добива модерна сала по шест децении.
Непосредно, до локацијата има атлетски полигон и повеќе спортски игралишта.
Изградбата на салата, сметаат рекреативците и спортистите го наподолнува просторот во близина на Соколанскиот парк.
Во Куманово пак, ова е трета спортска сала изградена со средства обезбедени од Владата.
Претходно беа изградени и пуштени во употреба спортските сали во основното училиште „Јероним Де Рада“ и во средното „Перо Наков“ каде наставата се изведува на албански наставен јазик.
МИА