Француската метеоролошка служба Метео Франс стави шест оддели во портокалова временска тревога поради снег и мраз во шест часот утрово, со најава за снежни врнежи што би можеле да достигнат од пет до 10 сантиметри и издаде предупредување до возачите поради мраз на патиштата.
Како што беше најавено, станува збор за изразен снежен бран што денес би можел да предизвика сериозни тешкотии во сообраќајот во североисточниот дел на Франција, објави BFMTV.
Температури под нулата, снег и силни налети на ветер беа причина за прогласување на зголемено ниво на подготвеност.
Според Метео Франс, снежниот бран доаѓа од правец на Германија и земјите од Бенелукс, во зоната на влијание на остатоците од претходната бура Горети, а снегот ќе се спушти до височини од 200 до 300 метри.
Се очекува висината на снежната покривка да достигне помеѓу седум и 10 сантиметри на височини од 300 до 400 метри, од 10 до 20 сантиметри помеѓу 400 и 500 метри, додека во повисоките планински региони локално би можела да достигне до 40 сантиметри.
Возачите се повикуваат да бидат исклучително внимателни, бидејќи во вториот дел од ноќта од сабота до недела се очекува температурата да биде значително пониска и постои зголемен ризик од формирање мраз.
Франција претходно беше погодена од бурата Горети, во која беа повредени најмалку шест лица и која остави повеќе од 380.000 домаќинства без електрична енергија, пред сè во Нормандија.
Бурата Горети, меѓу другото, влијаеше и на производството на електрична енергија во француската нуклеарна централа Фламанвил, каде што реакторите 1 и 3 беа исклучени по прекин на електричната енергија со висок напон, пренесува Танјуг.