Директорот на Агенцијата за помош и работа на ОН за палестинските бегалци (UNRWA), Филип Лазарини, рече дека Појасот Газа се претвори во „гробишта“ за деца и дека палестинските деца се „на работ да станат изгубена генерација”
„Тие се убиени, ранети, принудени да бегаат и лишени од безбедност, образование и игра. Детството им е украдено и тие се на работ да станат изгубена генерација, бидејќи изгубија уште една учебна година“, рече Лазарини во изјава по повод Светскиот ден на детето кој се одбележува на 20 ноември.
Тој, исто така, истакна дека децата на окупираниот Западен Брег се соочуваат со постојан страв и вознемиреност поради зголемувањето на насилството на таа палестинска територија од почетокот на војната во Газа во октомври 2023 година.
Палестинските групи во средата повикаа на меѓународна акција за заштита на децата во Газа и на Западниот Брег, наведувајќи ги „катастрофалните хуманитарни услови“, објави Ксинхуа.
Палестинското Министерство за надворешни работи објави соопштение во кое нагласува дека децата се најранливи и се изложени на услови кои ги нарушуваат нивните основни права, вклучително и правото на живот.
Во соопштението, исто така, се нагласува дека децата на окупираниот Западен Брег се подложени на истите „криминални“ политики, како што е произволно притворање, и се соочуваат со незаконски судења.
Во исто време, Палестинскиот национален совет објави дека децата во Газа „плаќаат висока цена во очите на светот, кој сè уште не е во состојба да го спречи овој геноцид“.
Од октомври минатата година, во израелските напади врз Појасот Газа загинаа 43.985, а ранети 104.092, според палестинското Министерство за здравство.
На почетокот на ноември, УНИЦЕФ објави извештај во кој се посочува дека децата сочинуваат 44 отсто од жртвите на војната во Газа, а најголемата поединечна категорија е на возраст од пет до девет години, потоа на возраст од 10 до 14 години, а потоа на возраст од четири и помалку.
Според УНИЦЕФ, најмладата жртва е новороденче, старо еден ден.