Договорот меѓу САД и Германија за повторно стационирање на американски крстосувачки ракети во Германија предизвика поделени реакции кај германската јавност, пренесува Хина.
„Се работи за тоа дека заштитата на Германија вклучува и заплашување, односно одвраќање, а за тоа ни требаат прецизни ракети со долг дострел. Затоа ова е добра одлука“, изјави германскиот канцелар Олаф Шолц (СПД) на маргините на самитот на НАТО во Вашингтон.
Заплашувањето како дел од одбраната
Одлуката за повторно стационирање на крстосувачки ракети, по пауза од повеќе од 20 години, ја оцени како оправдана.
„Сите знаеме дека има неверојатно вооружување во Русија, со оружје што ја загрозува и европската територија“, рече Шолц.
Тој го изрази своето зачуденост од критиките кои доаѓаат од внатре во неговата партија.
„За сите кои се занимаваат со прашања на одбраната, оваа одлука, која се донесува долго време, не е изненадување“, рече Шолц.
На маргините на самитот на НАТО, Германија и САД потпишаа договор за стационирање на крстосувачки ракети Томахавк со дострел над 2.000 километри, што е доволно за напад на Москва, која е околу 1.600 километри воздушна линија од германска територија.
Дополнително, планирано е распоредување на ракети земја-воздух од типот СМ-6, како и новоразвиени суперсонични ракети.
Стационирањето, како што е соопштено, е привремено, додека Германија и другите партнери на НАТО во Европа не развијат свои крстосувачки ракети.
Страв од трка во вооружување
Претставникот на СПД и член на левото крило на партијата Ралф Штегнер ја критикуваше одлуката за повторно поставување на ракетите.
„Сето тоа води кон нова трка во вооружување. Светот нема да стане побезбеден, напротив, запаѓаме во вител во кој светот станува се поопасен“, изјави Штегнер, кој е осамен во критиките во СПД.
Министерот за одбрана Борис Писториус (СПД) рече дека стационирањето на проектили е поврзано со очекувањата на Вашингтон дека Европа наскоро ќе развие свои ракети со долг дострел.
Критики искажаа делови од партијата Зелени, која е партнер на СПД во владејачката коалиција, но во исто време, министерот за економија од редовите на Зелените Роберт Хабек изрази „разбирање“ со потпишувањето на договорот со САД.
Екстремната десница и левицата се против
Популистичката, десничарска Алтернатива за Германија (AfD), која беше цел на обвинувања за проруски позиции, силно го критикуваше распоредувањето на американското ракетно оружје.
„Оваа акција ја прави Германија повторно мета на можни напади“, рече потпретседателот на АфД, Тино Чрупала.
Повторното стационирање на американските ракети со долг дострел беше критикувано и од Сахра Вагенкнехт од новооснованата популистичка левичарска партија БСВ, како и од претставниците на партијата Левица (Die Linke).
Главната опозициска ЦДУ/ЦСУ ја поздрави одлуката.
Во истражувањето на јавното мислење објавено од RTL, 47 отсто од испитаниците стравуваат дека одлуката за стационирање на проектили го зголемува ризикот од конфликт со Русија.
Москва го критикуваше договорот за стационирање на ракети, а МНР најави дека „ќе бидат преземени соодветни мерки“, не прецизирајќи кои мерки.