Лидерот на Украина, Володимир Зеленски, имаше „долг и значаен“ разговор со американскиот претседател, Доналд Трамп.
Како што истакна во објава на мрежата X, тие прво разговарале „еден на еден“, а потоа ги поканиле европските лидери да им се придружат.
Разговорот траел повеќе од час и половина, вклучувајќи околу еден час билатерален разговор со претседателот Трамп.
– Украина ја потврдува својата подготвеност да работи со максимални напори за постигнување мир. Претседателот Трамп информираше за неговата средба со рускиот лидер и за главните точки од нивниот разговор. Важно е силата на Америка да влијае на развојот на ситуацијата, напиша Зеленски.
Тој додаде дека го поддржува предлогот на претседателот Трамп за трилатерален состанок меѓу Украина, САД и Русија. Како што истакна, Украина нагласува дека клучните прашања можат да се решат на ниво на лидери и дека трилатералниот формат е погоден за тоа.
– Во понеделник ќе се сретнам со претседателот Трамп во Вашингтон, за да разговараме за сите детали во врска со завршувањето на убиствата и војната. Благодарен сум за поканата, рече тој.
– Важно е Европејците да бидат вклучени во секоја фаза со цел да се обезбедат сигурни гаранции за безбедност заедно со Америка, заклучи Зеленски.