По четврти пат денеска пред зградата на Управата за јавни приходи во Куманово се одржа протест против двојното оданочување на странските плати.
На протестот и денеска излегоа печалбарите кои работеле низ американските воени бази на Блискиот исток, а кои државата сега бара да платат данок за нивните плати од 2020 година.
Барањата и денеска останаа исти, меѓу кои да бидат ослободени од плаќање данок, оти 183 дена биле надвор од државата, а воедно компаниите за кои работеле веќе платиле данок во матичните држави.
Побараа УЈП по службена должност да обезбеди потврди од даночните служби на Ирак и Авганистан, оти тие сами не можат да одат таму за да добијат таков документ.
Остануваат на барањето за јавна средба со премиерот Христијан Мицкоски и директорката на УЈП Елена Петрова, но и со кумановскиот градоначалник Максим Димитриевски.
Протестите продолжуваат до петок, при што ќе биде блокирана крстосницата пред УЈП Куманово во период од 14 до 16 часот.
Никола Ивановски