Многу земји изразуваат подготвеност да бидат платформа за потенцијални преговори меѓу рускиот претседател Владимир Путин и новоизбраниот американски претседател Доналд Трамп, но прерано е да се зборува за тоа, изјави портпаролот на Кремљ, Дмитриј Песков.
Тој рече дека се уште нема суштински подготовки за средбата Путин-Трамп, но додаде дека постои политичка волја за тоа.
„Ваквите контакти се многу неопходни и препорачливи“, нагласи Песков, пренесе агенцијата РИА Новости.
Претходно денеска советникот на Трамп за национална безбедност Мајкл Волц изјави дека Путин и Трамп се очекува телефонски да разговараат во наредните денови или недели.
Српскиот претседател Александар Вучиќ претходно изјави дека Србија е заинтересирана да биде место за средба на Трамп и Путин и дека тоа може да гарантира целосна безбедност за двајцата претседатели.