Американските власти потврдија дека доколку претседателката на Претставничкиот дом на САД, Ненси Пелоси, замине во Тајван, војската ќе го зголеми движењето на вооружените сили и воените средства во индо-пацифичкиот регион.
Заминувањето на Пелоси во Тајван сè уште е неизвесно, но ако го направи тоа, Пентагон развива планови за вонредни ситуации, пишува американскиот магазин „Тајм“.
Тие одбија да дадат детали, но рекоа дека воени авиони, морнарица, средства за надзор и други воени системи најверојатно ќе се користат за да се обезбеди летот на Пелоси до Тајван.
Секое патување на висок американски функционер во странство бара дополнителни безбедносни мерки, но американските власти оваа недела сугерираа дека посетата на Пелоси на Тајван ќе ги надмине нормалните мерки на претпазливост и потсетија дека Ненси Пелоси е највисокиот американски функционер што планира патување во Тајван од нејзиниот претходник Њут Гингрич пред 25 години.
Запрашан за планираните воени чекори за заштита на Пелоси во случај на патување во Тајван, американскиот генерал Марк Мили, претседател на Здружениот генералштаб, рече дека е премногу рано да се зборува за „конкретно патување“ и додаде „доколку се донесе одлуката Пелоси да патува и да побара воена поддршка, ќе сториме се што е потребно“.
Кина го смета Тајван за своја територија, а кинескиот претседател Си Џинпинг, во разговор со неговиот американски колега Бајден во четвртокот, ги предупреди САД да не „играат со оган“ кога станува збор за Тајван.
Кинески воени вежби во Тајванскиот теснец и предупредување за Пелоси
Кина соопшти дека денеска спроведува воени вежби во Тајванскиот теснец, откако претходно ја предупреди претседателката на Претставничкиот дом на САД, Ненси Пелоси да се откаже од плановите да го посети Тајван, кој Пекинг го смета за своја територија.
Партиското раководство на Кинеската Народноослободителна армија потврди дека меѓу 8 часот и 21 часот ќе бидат спроведени „вежби за таргетирање“ во близина на островот Пингтан во близина на провинцијата Фуџијан, објави официјалната новинска агенција Ксинхуа, а Управата за поморска безбедност ги предупреди бродовите да ја избегнуваат областа.
Ваквите вежби обично вклучуваат учество на артилерија, но во соопштението се посочува дали на денешната вежба ќе учествуваат ракетни единици, воздухопловни сили и друго оружје.