Пентагтон размислува за пренасочување на воената помош наменета за Украина кон Блискиот Исток, бидејќи војната во Иран ги исцрпува некои од најважните залихи на муниција на американската војска.
Според три лица запознаени со ситуацијата, оружјето што би можело да се пренасочи вклучува пресретнувачки ракети за воздушна одбрана нарачани преку програмата на НАТО.
Иако конечната одлука сè уште не е донесена, таков потег би ги истакнал растечките компромиси со кои се соочуваат САД за да ги одржат воените операции против Иран, каде што Централната команда на САД погоди повеќе од 9.000 цели за помалку од четири недели борби, пишува „Вашингтон пост“.
Програма за набавка преку НАТО
Оружјето што би можело да се пренасочи од Украина е нарачано преку програмата на НАТО започната минатата година во која земјите-партнери купуваат американско оружје за Киев, рекоа три лица кои зборуваа под услов на анонимност поради чувствителноста на темата.
Оваа иницијатива, позната како Листа на приоритетни украински барања (PURL), го обезбеди протокот на избрана воена опрема кон Киев дури и откако администрацијата на Трамп ја прекина поголемиот дел од директната безбедносна помош на Пентагон.
Главните европски сојузници на Киев ја презедоа водечката улога во финансирањето и вооружувањето на украинските сили откако претседателот Доналд Трамп ја презеде функцијата.
Договорот му донесе политичка победа на Трамп и му овозможи на НАТО да ги смири стравувањата дека Киев може да остане незаштитен од амбициите на администрацијата за мировен договор со Русија.
Официјални реакции
Во официјално соопштение, портпаролот на Пентагон рече дека Министерството за одбрана ќе „обезбеди американските сили и силите на нашите сојузници и партнери да имаат сè што им е потребно за да се борат и да победат“, но одби дополнителни коментари.
Олга Стефанишина, амбасадорка на Украина во САД, рече дека Киев ги информира партнерите за своите потреби, вклучително и за воздушната одбрана, но го разбира „периодот на значителна неизвесност“ за време на војната.
„Сите почетни прекини во испораката поради неодамнешните операции на Блискиот Исток се решени“, рече Стефанишина.
Како одговор на прашањата, функционер на НАТО не коментираше дали воената алијанса е свесна или загрижена за можното пренасочување на американската опрема.
Во е-пошта, тој изјави дека земјите „продолжуваат да придонесуваат за PURL и опремата продолжува да пристигнува во Украина“.
Тој додаде дека од минатото лето, иницијативата испорачала 75 проценти од ракетите за украинските системи „Патриот“ и речиси целата муниција што се користи во другите системи за воздушна одбрана.
Загриженоста на европските сојузници
Откако започна нападот на САД врз Иран на 28 февруари, европските престолнини се загрижени дека Вашингтон брзо ги осиромашува своите залихи на муниција.
Двајца европски дипломати, зборувајќи анонимно, изразија загриженост дека таквото темпо може да ги одложи сопствените нарачки и да ги наруши испораките на американски системи за Украина според PURL.
„Тие навистина трошат муниција, па сега прашањето е колку ќе продолжат да снабдуваат преку тој договор“, рече еден од дипломатите.
Меѓу најбараната муниција за војна се напредните пресретнувачи на воздушна одбрана, вклучувајќи ги системите „Патриот“ и „THAAD“.
Американската војска веќе ги пренасочи ваквите ракети од други делови на светот, вклучувајќи ја Европа и Источна Азија, кон Блискиот Исток.
Во исто време, ова се системи што очајно ѝ се потребни на Украина за да се одбрани од постојаните руски напади.
Едно лице запознаено со внатрешните разговори во Пентагон рече дека испораките преку PURL веројатно ќе продолжат, но идните пакети би можеле да бидат без противвоздушни системи, бидејќи САД се обидуваат да ги надополнат сопствените залихи и оние на сојузниците во Персискиот Залив.
„Политичката дебата се врти околу тоа колку да се даде на Украина“, рече друго лице. „Тоа е вистинска, жива дискусија“.
Сомнително финансирање и пренасочување на пари
Не е јасно дали американските пратки само ќе бидат одложени и исполнети подоцна или целосно пренасочени.
Пентагон може да ги пренасочи таквите пратки во случај на итна воена потреба, но ќе мора да го извести Конгресот.
Администрацијата на Трамп подготвува барање за дополнителен буџет за одбрана, кој, според првичниот предлог на Министерството за одбрана, би изнесувал повеќе од 200 милијарди долари.
Во јануари, Конгресот одобри 400 милиони долари долгорочна помош за Украина преку посебна програма (USAI), за која Пентагон директно склучува договори за производство на оружје со американски компании.
Сепак, според известувањето што Пентагон го испрати до Конгресот, дел од европските пари од PURL биле искористени за купување опрема што претставниците имале намера да ја платат со американски средства преку USAI.
Останува нејасно, рече американскиот функционер, дали Пентагон ги користи средствата од PURL покрај или наместо парите што веќе ги одобри Конгресот.
Во понеделник, Пентагон го информираше Конгресот дека има намера да пренасочи околу 750 милиони долари од програмата PURL за да ги надополни сопствените резерви на американската војска, наместо да испраќа дополнителна помош за Украина.
Според двајца американски функционери, не е јасно дали европските земји кои учествуваат во иницијативата разбираат како се трошат нивните средства.