Големи кинески градови издадоа предупредувања за топлотен бран, при што се очекува во Пекинг да достигне повеќе од 36 степени целзиусови денес, бидејќи Кина се подготвува за уште една година на рекордни температури што може да ги загрози снабдувањето со електрична енергија, посевите и кревката економија.
Кина од март веќе е зафатена од топлотни бранови во неколку делови на земјата.
Неодамна, провинцијата Јунан е зафатена од температури од над 40 степени целзиусови, што става посебен притисок на електричната мрежа бидејќи милиони домови вклучуваат климатизери.
Во текот на изминатите неколку дена, провинцијата Шандонг и Пекинг издадоа предупредувања за топлотен бран.
Во населените градови како Џинан, Тијанџин и Џенгжу се очекува температурите да се искачат до 37 Целзиусови степени.
„Подгответе се за уште поекстремни жештини оваа година“
Кинеската метеоролошка управа ги предупреди регионите да се подготват за уште поекстремни горештини оваа година.
Спорадични топлотни бранови се случуваат во пресрет на редовната летна сезона – што е особено загрижувачко за земјоделскиот сектор.
Оштетувањето на земјоделските култури може да ги зголеми цените на храната, да ја влоши инфлацијата и да изврши дополнителен притисок врз кинеската економија додека се обидува да се опорави од тригодишната политика за ограничување на „Ковид-19“ за намалување на растот.
Јунан на југозапад, историски познат по благото време, имаше само 35 милиметри дожд во годината до 20 април, објави неодамна државната телевизија CCTV.
Во главниот град на провинцијата, Кунминг, наврнале помалку од 8 мм дожд, што е најниско досега.
„Развојот на Ел Нињо најверојатно ќе доведе до нов скок на глобалното затоплување“
Метеоролозите ги обвинуваат климатските промени за неодамнешните тешки временски услови.
Последната проценка на Светската метеоролошка организација (СМО) предвидува и голема веројатност за враќање на временскиот феномен Ел Нињо подоцна оваа година.
„Развојот на Ел Нињо најверојатно ќе доведе до нов скок на глобалното затоплување и ќе ја зголеми можноста за соборување на температурни рекорди“, изјави генералниот секретар на СМО, Петри Таалас.