Франција го поздрави усвојувањето на „невидени“ европски санкции против Русија, откако Европската Унија утрово го усвои 18-от пакет казнени мерки против Москва поради војната во Украина.
„Ние, Европејците, утрово усвојуваме невидени санкции против Русија и земјите што ја поддржуваат“, објави онлајн францускиот министер за Европа и надворешни работи Жан-Ноел Баро.
Тој истакна дека Франција одиграла одлучувачка улога во ова.
„Заедно со Соединетите Американски Држави, ќе го принудиме (рускиот претседател) Владимир Путин да прекине со огнот“, заклучи шефот на француската дипломатија.
Утрово, на состанок на амбасадорите, ЕУ усвои нови мерки насочени кон ослабување на руската економија, преку пакет санкции што предвидува пад на цената на руската нафта одобрена за извоз.
Новиот казнен пакет беше усвоен откако Словачка, која постојано го блокираше усвојувањето на санкциите против Москва, се согласи да го укине ветото откако доби гаранции за снабдување со гас, во време кога ЕУ се стреми целосно да престане да увезува руски гас до 2027 година, според француската телевизија BFM.