Папата Фрациск вчера изјави дека се чувствува дел од семејството на домородните жители на Канада, откако помина пет дена во Канада, каде што отпатува за да побара прошка за децениското злоставување на домородните деца.
„Дојдов во покајнички дух да ви ја искажам болката што ние како Црква ја носиме во нашите срца поради штетата што многу католици ви ја нанесоа поддржувајќи ја насилничката и неправедна политика кон вас“, рече 85-годишниот поглавар на Католичката црква во Ќебец, на крајот од неговата посета.
„Се чувствувам како дел од вашето семејство“
„Дојдов во Канада како пријател, да ве запознаам, да видам, слушнам и да разберам како живеат домородните жители на оваа земја“, рече Светиот Отец, кој со својата посета сака да го промовира помирувањето меѓу канадските домородци и оние кои подоцна дојдоа како колонизатори.
„Би се осмелил да кажам, ако ми дозволите, дека сега, во извесна смисла, и самиот се чувствувам дел од вашето семејство и ме почести тоа“, рече тој.
Пред заминувањето во петокот, папата Франциск требаше да се сретне со претставниците на Инуитите на крајниот север на земјата, на само неколку километри од Северниот пол. Тој треба да се врати во Рим во сабота.
Тој постојано бараше прошка за злоставување деца
Папата веќе побара прошка за улогата на Црквата во злоупотребата на децата во католичките интернати за време на посетата на претставниците на канадските први нации, племињата Метис и Инуити на Ватикан на крајот на март.
И при посетата на Канада извинувањето го повтори во неколку наврати.
„Огромните пространства на оваа земја нѐ охрабруваат да размислуваме за долгиот пат на исцелување и помирување низ кој мораме да поминеме заедно“, рече тој во петокот.
Зборовите на папата наидоа на одобрување од некои, додека други ја повикаа Светата столица да ги отвори архивите за системот на католичките интернати.
Откривањето на стотици необележани детски гробници во близина на интернати во мај минатата година предизвика глобален скандал, иако со години се зборува за исчезнувањето на домородните деца во Канада.