Папата Франциско повика на нови меѓународни договори за намалување на должничкиот товар со кој се соочуваат земјите со ниски приходи и пренасочување на трошоците од оружје и воена опрема кон искоренување на глобалниот глад.
Во пораката пред Светата 2025 година на Римокатоличката црква, која започнува на 24 декември, Папата рече дека глобалните климатски промени, војните, нееднаквиот третман на мигрантите и други прашања „го загрозуваат опстанокот на човештвото како целина“.
„Промените се неопходни“
Спорадичните чинови на филантропија не се доволни, рече тој.
„Потребни се културни и структурни промени за да се случат трајни промени“, нагласи Папата.
Католичките свети години, познати и како јубилеи, обично се случуваат на секои 25 години и се сметаат за време на мир и простување. Овој јубилеј ќе трае до 6 јануари 2026 година.
Повикот на Папата во пресрет на јубилејот беше дел од неговата годишна порака за Светскиот ден на мирот на Римокатоличката црква, кој се слави на 1 јануари.
Насловот на пораката што традиционално им се испраќа на светските лидери и раководителите на институции како што се Обединетите нации е „Прости ни ги долговите: дај ни го твојот мир“.
„Укинување на смртната казна“
Папата ги повика и сите земји да ја укинат смртната казна, на која се противи Католичката црква.
За време на неговото 11-годишно папство, Франциско постојано ги повикуваше поразвиените земји да ги простат долговите со кои се соочуваат земјите со ниски приходи.
Во новата порака Папата рече дека и многу посиромашни земји се соочуваат со „еколошки долг“ поради очекуваните влијанија од климатските промени.
„Надворешниот долг стана средство за контрола при што одредени влади и приватни финансиски институции на побогатите земји бескрупулозно и неселективно ги искористуваат човечките и природните ресурси на посиромашните земји“, рече Папата.