Папата Франциско денеска, на вториот ден од посетата на Португалија, ги повика студентите да го направат светот поправеден и поинклузивно место и да ја искористат својата привилегија во борбата против глобалното затоплување и економските нееднаквости.
Тој ги повика студентите да преземат ризик и да го отфрлат искушението само да го задржат статус квото, односно, како што рече, сегашниот глобален систем на елитизам и нееднаквост, пишува Асошиетед прес.
„Академската диплома не треба да се гледа само како лиценца за постигнување лична благосостојба, туку како мандат да се работи за поправедно и поинклузивно, односно, навистина прогресивно општество“, рече тој.
Папата ги повика студентите да ја искористат привилегијата на своето образование за да работат за општо добро, особено во грижата за животната средина, сиромашните и маргинализираните.
Тој рече дека сегашните ветувања за спречување на глобалното затоплување само ја одложуваат, како што вели, неизбежна катастрофа.
„Наместо поларизирани пристапи, потребна ни е обединета визија, визија која е способна да ја опфати целината“, рече папата Фрањо.
По посетата на Католичкиот универзитет, Папата го посети крајбрежниот град Каскаис, каде што се наоѓа локалниот огранок на неговата фондација „Сколас Оккурентес“, која ја основа пред многу години за да ги собере младите од различни потекла и националности.
Најголемиот фестивал на католичката младина, Светскиот ден на младите се одржува од 1 до 6 август во Лисабон.
Фестивалот, основан на иницијатива на починатиот папа Јован Павле, се одржува на секои две до три години.