Папата Франциск повика на прекин на блокадата на извозот на пченица од Украина, велејќи дека храната не треба да се користи „како воено оружје“.
Папата рече дека „со голема загриженост ја следи“ ситуацијата во украинските пристаништа и дека животите на милиони луѓе зависат од извозот на пченица, „особено меѓу најсиромашните земји“.
„Ве повикувам од се срце да вложите максимални напори за да се реши ова прашање, да се гарантираат универзалните човекови права. Ве молиме, не користете ја пченицата, основната храна, како воено оружје“, рече Папата.
Украина моментално работи на „поморска операција предводена од ОН“ со морнариците на земјите-партнери за да се обезбеди сигурна трговска рута за извоз на нејзините земјоделски производи, изјави во вторникот украинскиот министер за надворешни работи Дмитро Кулеба.
Украинскиот претседател Володимир Зеленски претходно изјави дека 22 милиони тони жито, што сочинува речиси половина од извозот на жито на Украина, се задржани поради руската блокада на главните извозни патишта.
Кремљ постојано ги отфрли обвинувањата дека ја блокирал испораката на жито од Украина и го обвини Западот за дејствијата што доведоа до оваа криза.