Палестинската управа ги поздрави „искрените и решителни напори“ на американскиот претседател Доналд Трамп откако тој објави план за прекин на војната во Газа.
Во соопштението се вели дека администрацијата „ги поздравува искрените и решителни напори на претседателот Доналд Џ. Трамп за прекин на војната во Газа и ја потврдува довербата во неговата способност да најде пат кон мир“.
Планот на Трамп повикува на прекин на огнот, ослободување на заложниците од страна на Хамас во рок од 72 часа, разоружување на Хамас и постепено повлекување на Израел од Газа.
Други клучни точки вклучуваат распоредување на „привремена меѓународна стабилизациска сила“ – и создавање преодна влада предводена од Трамп, во која ќе биде вклучен и поранешниот британски премиер Тони Блер.
Министрите за надворешни работи на Саудиска Арабија, Јордан, Обединетите Арапски Емирати, Индонезија, Пакистан, Турција, Катар и Египет ги поздравија напорите на Трамп за прекин на војната во Газа во заедничка изјава, пренесува АФП.