Израелската армија убила најмалку 91 Палестинец, меѓу кои најмалку 35 деца, во нападите врз Појасот Газа од синоќа, и покрај договорот за прекин на огнот, објавија медицински извори, пренесува Anadolu.
Израелската армија уби 31 лице на север, 42 во централните области и 18 на југот на Појасот Газа.
Во нападите се ранети десетици цивили, јави државната новинска агенција Вафа, повикувајќи се на извори од болниците во Газа.
Израелските напади погодија куќи, шатори кои служат како засолништа за раселените цивили, едно возило, засолниште и болница во таканаречената „жолта линија“, изјавија медицинските лица за агенцијата Anadolu.
„Жолтата линија“ се однесува на зоната во која израелските сили се повлекоа во согласност со договорот за прекин на огнот.
Физички го дели Појасот Газа на два дела, се наоѓа на територијата на Газа, јужно од градот Газа и северно од Кан Јунис.
На северот на Газа погодени се засолниште, куќи и џамија
На северот на Газа, израелската армија цели на училиште претворено во засолниште во областа Беит Лахиа, при што загинаа тројца цивили, а неколку други беа повредени.
Израелската армија гранатираше две куќи во населбата Ал Наср во бегалскиот камп Шати во западниот дел на градот Газа, при што загинаа осум лица.
Нов израелски напад во средата наутро погоди џамија која служеше како засолниште за раселените луѓе во населбата Сабра во градот Газа, изјавија очевидци за агенцијата Anadolu.
Две лица загинаа, а десет се ранети во населбата Зејтун во Газа. Неколку цивили се уште се водат за исчезнати под урнатините на куќа погодена од израелската армија, додека неколку луѓе се ранети во друг напад југозападно од Зејтун.
Израелската армија уби мајка и дете во населбата Тел ал Хава во Газа.
Четворица загинати во нападот на шаторот
Во центарот на Газа, четири лица ги загубија животите откако израелски напад го погоди нивниот шатор во Деир ал Балах.
Шест лица загинаа, а повеќе се ранети кога израелски авиони бомбардираа училиште претворено во засолниште и куќа во бегалскиот камп Буреиј.
Пет лица загинаа во напади на неколку куќи во бегалскиот камп Нусејрат.
Во сличен напад, девет лица, меѓу кои четири деца, загинаа, а девет се водат за исчезнати под урнатините на куќата погодена од израелската војска во кампот Нусејрат.
Осум лица, меѓу кои три деца, беа убиени во израелски напад врз шатори во кои се сместени раселените семејства во областа Ал-Маваси, западно од Кан Јунис, во јужниот дел на Газа.
Медицински извори наведуваат дека бројот на жртвите може да се зголеми бидејќи многу од ранетите се во критична состојба, а потрагата по исчезнатите под урнатините се уште трае.