Талибанската влада на Авганистан соопшти дека ќе обезбеди „неопходен одговор“ на ноќните пакистански воздушни напади во источните провинции на земјата, во кои загинаа 10 цивили, вклучувајќи девет деца и една жена.
Нападите беа извршени во провинциите Хост, Кунар и Пактика, а четири лица беа повредени, објави АП.
Портпаролот на талибанската влада, Забихулах Муџахид, ги опиша нападите како „злосторства“ и „кршење на авганистанската територија“, нагласувајќи дека Авганистан го задржува правото да ги брани своите луѓе и територија.
Пакистан сè уште не ги коментираше овие обвинувања.
Конфликтите не запираат
Ескалацијата се случи повеќе од еден месец по прекуграничните судири кога авганистанските власти тврдеа дека пакистански беспилотни летала го нападнале Кабул, и покрај прекинот на огнот постигнат со посредство на Катар и Турција во октомври.
Иран, исто така, понуди да посредува во ублажување на тензиите меѓу двете земји.
Тензиите дополнително се заострија по смртоносниот напад во Пешавар претходниот ден, во кој тројца напаѓачи убија тројца полицајци и ранија 11, а се сомневаат и дека се работи за Техрик-е-Талибан Пакистан (ТТП), група тесно поврзана со авганистанските талибанци.
Во меѓувреме, Пакистан ги засили операциите против ТТП, вклучително и рации во северозападната покраина Хајбер Пахтунхва, каде што беа убиени 22 милитанти.
Исламабад тврди дека Авганистан и Индија ги поддржуваат борците, што Кабул и Њу Делхи го негираат.
Од почетокот на конфликтот, билатералната трговија меѓу Авганистан и Пакистан е практично суспендирана, а граничните премини остануваат затворени, што го отежна движењето на жителите од двете страни на границата, истакнува агенцијата.