Пакистан ќе формира нови воени сили посветени на следење и управување со ракетните капацитети во случај на конвенционална војна, изјави премиерот Шехбаз Шариф.
Шариф го изјави ова синоќа за време на церемонијата во Исламабад по повод 78-годишнината од Денот на независноста на Пакистан, објави Ројтерс.
„Новите ракетни сили ќе бидат опремени со модерна технологија и ќе претставуваат пресвртница во зајакнувањето на борбената готовност на пакистанската армија“, рече Шариф.
Дополнителни детали не се објавени.
Висок безбедносен службеник, кој зборуваше под услов да остане анонимен, рече дека новоформираните сили ќе имаат своја командна структура во рамките на војската и ќе бидат задолжени за ракување и распоредување ракети во случај на отворен конфликт.
„Очигледно е дека овој потег е насочен кон Индија“, рече службеникот.
Пакистан и Индија, обете земји со нуклеарно оружје, се во затегнати односи со децении откако добија независност од Велика Британија во 1947 година, истакнува Ројтерс.
Најновиот бран тензии беше забележан во април кога 26 цивили беа убиени во индискиот дел од Кашмир, за што Њу Делхи го обвини Исламабад.
Пакистан негираше каква било вмешаност.
Конфликтот ескалираше во мај, кога двете страни разменија оган користејќи ракети, беспилотни летала и борбени авиони, пред конфликтот да заврши со прогласување прекин на огнот.
Официјален Исламабад наведува дека Соединетите Американски Држави, предводени од претседателот Доналд Трамп, посредувале во договорот, додека Индија тврди дека примирјето е постигнато билатерално, без улога на трета страна, пренесува Танјуг.