Холандскиот премиер Марк Руте најави оставка на својата влада во петокот, откако четирипартиската коалиција се распадна поради несогласувањата околу имиграциската политика.
На прес-конференција по состанокот на коалициските партии за заострување на имиграциската политика, Руте рече дека разликите се непомирливи.
Тој рече дека оставката на Владата веднаш ќе ја достави до кралот Вилем-Александар.
Тој рече дека функционерите прво ќе го иницираат изборниот процес и дека неговата влада ќе остане на функцијата како привремена администрација до изборите.
Дел од пратениците од опозицијата изразија задоволство и побараа што поскоро избори за Долниот дом на Парламентот со 150 пратенички места.
Холандскиот премиер со најдолг стаж ја објави одлуката неколку часа по извештаите за распадот на владејачката коалиција, која не успеа да постигне договор за тоа како да се справи со барателите на азил кои влегуваат во земјата.
По неколкудневни разговори меѓу клучните членови на кабинетот предводен од Руте, не беше постигнат договор и владејачката коалиција пропадна, објави претходно NL Times, цитирајќи извор „близок до преговорите“.
Со колапсот заврши четвртиот мандат на кабинетот на Руте, кој беше инаугуриран на 1 октомври минатата година.