На европските берзи во понеделник наутро најзначајните индекси забележаа благ пад, следејќи ги азиските берзи, додека инвеститорите чекаат нови насоки за објавување на заработката на големите технолошки и компании од секторот на производи за широка потрошувачка.
Паневропскиот индекс Stoxx 600 беше намален за 0,2 отсто околу 10 часа. Во исто време, најмногу падна секторот производство на нафта и гас, за 1,15 отсто, под влијание на корекцијата на цената на нафтата за повеќе од еден отсто.
Истовремено, франкфуртски DAX падна за 0,06 отсто, на 15.872 поени, лондонскиот FTSE индекс за 0,16 отсто, на 7.901 поен, а париски CAC за 0,26 отсто, на 7.557 поени.
Инвеститорите го чекаат објавувањето на деловните резултати на големите американски технолошки компании како Microsoft, Alphabet и Amazon.
Засега сезоната на објавување на деловните резултати на американските компании не е многу светла, со оглед на тоа што забавува растот на економиите, а со тоа и потрошувачката на домаќинствата.
Според последните проценки на аналитичарите во истражувањето на Ројтерс, заработката на компаниите од индексот S&P 500 ќе биде околу 5 отсто помала во првиот квартал отколку во истиот квартал минатата година.
До крајот на неделата се очекуваат резултатите на големите европски банки Дојче банк, Баркли и УБС, а нови насоки на инвеститорите ќе добијат и резултатите на големите производители на стоки за широка потрошувачка – Нестле, Унилевер и Рекит.
Токискиот индекс Никеи во понеделникот зајакна 0,1 отсто, на 28.593 поени.