На азиските берзи цените на акциите паднаа, по вчерашниот раст, бидејќи инвеститорите беа разочарани од слабите податоци од кинеската економија и поради опаѓањето на ентузијазмот за новите стимулативни мерки.
Индексот MSCI на азиско-пацифичкиот регион беше околу 0,7 отсто во минус околу 7 часа, губејќи дел од вчерашните добивки.
Истовремено, на токиската берза индексот Никеи ослабе за 0,1 отсто, додека цените на акциите во Јужна Кореја, Австралија, Шангај и Хонг Конг се лизнаа меѓу 0,1 и 1,4 отсто.
Најслаб раст во последните осум месеци
Инвеститорите утрово беа разочарани од извештајот кој покажува дека активноста во услужниот сектор во Кина во август забележа најслаб раст во последните осум месеци поради слабата домашна побарувачка.
Ова покажува дека закрепнувањето на втората по големина светска економија се уште е слабо и покрај мерките што властите се обидуваат да ја поттикнат потрошувачката.
Вчера токму поради ваквите мерки нагло пораснаа цените на кинеските и другите акции во регионот.
„Послабите од очекуваните податоци од услужниот сектор го променија расположението на пазарот. Кинеските мерки всушност претставуваат олабавување на многу строги ограничувања, кои можат да ја забават или запрат понатамошната штета, но тие не се такви мерки што би можеле да ја поправат штетата и да стимулираат значителен економски раст“, објаснува Чару Чанана, стратег во Saxo Bank.
Внимателноста на пазарите е последица и на немањето вести од Волстрит бидејќи вчера во САД немаше работа поради празникот.
Пазарите се поддржани од одлуката на австралиската централна банка да ја задржи основната каматна стапка непроменета на 4,1 отсто.
Благодарение на ублажувањето на инфлаторните притисоци, трет месец по ред централната банка не ги зголемува каматните стапки, па инвеститорите се надеваат дека циклусот на покачување на каматите е завршен.
Доларот благо ослабе
И на валутните пазари вредноста на доларот во однос на кошничката валути благо падна.
Индексот на доларот, кој ја покажува вредноста на американскиот долар во однос на другите шест најважни светски валути, утринава се движи околу 104,18 поени, додека вчера во ова време изнесуваше 104,20 поени.
Истовремено, курсот на доларот во однос на јапонската валута порасна од вчерашните 146,20 на 146,55 јени.
Сепак, американската валута ослабе во однос на европската, па цената на еврото достигна 1,0795 долари, додека вчера во овој момент беше 1,0780 долари.
Цените на нафтата, пак, се движат во различни насоки. Цената на барелот на лондонскиот пазар утринава се намали за 0,04 отсто, на 88,95 долари, додека на американскиот пазар цената на барелот порасна за 0,48 отсто, на 85,95 долари.