Посетителите на Соренто, на југозападниот брег на Италија, би можеле да бидат казнети до 500 евра за шетање во бикини – според новите правила воведени од градоначалникот Масимо Копола.
Копола им кажа на новинарите дека скудно облечените туристи предизвикуваат „непријатност на локалните жители“, пренесува британски Тајмс.
Тој вели дека сака да се бори против „распространето непристојно однесување“ кое „повеќето луѓе го сметаат спротивно од пристојноста и кое го карактеризира цивилизираниот соживот“.
„Постојаното толерирање на ваквото однесување, како и предизвикувањето непријатност кај населението и посетителите, може да доведе до негативна проценка за квалитетот на животот во нашиот град, со последици за неговиот имиџ и туризмот“, додаде Копола.
Локалниот новинар Макс Таманти ги нарече групите туристи облечени во бикини и без кошули „ужасна поворка“ и рече дека тие го претвораат градот во сцена од пеколот на Данте.
Соренто е популарна станица на брегот на Амалфи, омилена меѓу влијателите и младите парови поради нејзините совршени згради и ресторани на врвот на карпите кои се спуштаат до морето.