Како дел од годишните награди Traveller’s Choice, TRIPADVISOR објави листа на најубави плажи во светот во 2023 година, а на четврто место се најде плажата во Исланд позната по суровата средина и темната историја.
Плажата Рејнисфјара
Плажата Рејнисфјара во Вик, Исланд е прогласена за најубава во Европа, но ова не е плажа на која ќе уживате во сончање и капење.
Оваа туристичка атракција е позната по црниот песок кој настанал од излевањето на лавата во океанот и е опкружена со високи карпи, а силните морски струи предизвикуваат бранови високи и до 40 метри.
Фановите на серијата Game of Thrones ќе ја препознаат како една од локациите за снимање, а плажата која се наоѓа на јужниот брег на Исланд всушност крие мрачна историја.
Имено, многу туристи на оваа плажа ги загубија животите обидувајќи се да направат совршена фотографија.
Плажата е измиена од силните бранови на северниот дел на Атлантикот кои доаѓаат во непредвидливи интервали, а туристите кои ќе се приближат премногу до водата ризикуваат да бидат однесени од брановите на карпите, па затоа е најдобро да се восхитувате на нејзината убавина од брегот.
Најубавите плажи на светот
Првото место на листата на најубави плажи во светот во 2023 година го зазеде бразилската плажа Баја де Санчо до која се стигнува со спуштање по скала и камени скалила, а ја краси совршениот бел песок и тиркизното море.
Заедно со бразилската плажа, меѓу најубавите се плажата Игл во Аруба, Кејбл плажата во Австралија, споменатата Рејнисфјара на Исланд, плажата Грејс Беј на островите Туркс и Каикос, Праја да Фалесија во Португалија, плажата Раданагар во Индија, Спиаџиа деи Конигли на италијанскиот остров Лампедуза, плажата Варадеро на Куба и плажата Каанапали на Хаваите.