Околу 130 ученици деновиве ќе бидат дел од спортската манифестација Забавни фудбалски школи – Куманово, која официјално започна да се одржува утринава на спортските терени на градскиот кеј.
Настанот на кој учествуваат деца од прво до петто оделение од седум кумановски основни училишта, е развиен по концептот кој потекнува од Данскиот фудбалски сојуз. Неговата основна идеја е забавниот концепт, а она што е важно е аспектот на играта, задоволството кое произлегува од играњето, а не резултатот и подобрувањето на нивото на вештините.
Настанот за отворен го прогласи градоначалникот на Општина Куманово, Максим Димитриевски кој изрази верување дека еден ден овие деца ќе станат професионални играчи.
– Од овде сакам да ви порачам на сите вас, бидете вредни, работете упорно, тренирајте, слушајте ги вашите професори, но првенствено и вашите родители, кога грешат кажете им дека грешат, а вие корегирајте се низ вашата игра и понатамошниот живот и бидете добри граѓани на нашата општина и нашата држава Република Македонија. Верувам дека по овој настан, ќе се изградат нови таленти во нашиот град кои ќе напредуваат и ќе дадат свој допринос за развој на фудбалот и спортот воопшто во државата и во целост во нашиот град. Го прогласувам овој турнир за отворен и најдобрата екипа нека победи, рече Димитриевски.
Loading...
Многубројните вежби и игри се димензионирани така што овозможуваат повеќекратно доживување на мали успеси кај секој од учесниците.
Забавни фудбалски игри се реализира под покровителство на Градоначалникот и Советот на Општина Куманово, а момчињата и девојчињата ќе се натпреваруваат под менторство на нивните наставници.