Поранешната шкотска премиерка Никола Старџен беше ослободена шест часа откако беше уапсена за време на истрагата за финансиите на владејачката Шкотска национална партија.
Таа неколку часа беше испрашувана од полицијата на Шкотска, која рече дека 52-годишната жена е приведена „како осомничена во врска со тековната истрага за финансирањето и финансиите на Шкотската национална партија“.
Старџен беше „ослободена без обвинение во очекување на понатамошна истрага“ околу шест часа подоцна, соопшти полицијата.
Таа по ослободувањето рече дека апсењето било „шокантно и длабоко вознемирувачко“.
„Знам без сенка на сомнеж дека сум невина, не направив ништо незаконско“, напиша Старџен на Твитер.
Полицијата на Шкотска истражува како се потрошени 600.000 фунти (745.000 американски долари) наменети за кампањата за независност на Шкотска.
Партискиот благајник Колин Бити и извршниот директор Питер Мурел беа претходно уапсени и испрашани како дел од истрагата, но ниту еден не е обвинет.
Мурел е сопруг на Старџен, а полицијата го пребара домот на двојката во Глазгов по неговото апсење во април.
Многу е невообичаено да биде уапсен лидер или поранешен лидер на политичка партија во ОК.
Последниот таков случај го вклучуваше претходникот на шкотската националистка Старџен, Алекс Салмонд, кој беше уапсен во 2019 година и обвинет за низа сексуални престапи, вклучително и обид за силување.
Тој беше ослободен од сите 13 обвиненија по судењето во јануари 2020 година.
Старџен неочекувано поднесе оставка во февруари по осум години како лидер на партијата и премиер на полуавтономната влада на Шкотска.
Таа тогаш изјави дека е вистинско време таа, нејзината партија и нејзината земја да отстапат место на некој друг.