Новата урбана опрема поставена неодамна на Градскиот кеј во Куманово деновиве беше повторно мета на вандали.
Окторнати и скршени клупи, расфрлани канти за смет, ова е глетката која вчера наутро можеше да се забележи на шеталиштето на кејот.
– Сакале или не, ќе мора да разбереме дека оваа е наш заеднички имот за кој треба да се грижиме сите заедно, ние ќе продолжиме со поставување на нова урбана опрема (клупи и канти за отпадоци) низ сите делови на градот, вели градоначалникот на Општина Куманово Максим Димитриевски.
За најновиот вандалски чин, се огласија и од Јавното претпријатие „Чистота и зеленило“.
– И покрај големите напори што ги прават ЈП „Чистота и зеленило“ и општина Куманово, за да се зачува урбаната опрема во градот, да биде во добра кондиција и во секое време да им стои на располагање на неговите жители, сепак неодговорни и несовесни граѓани вандалски се однесуваат кон урбаната опрема и често се случува да бидат оштетени и откорнати корпите за ситен комунален отпад, како и скршени и откорнати клупи за седење, велат од ЈП „Чистота и зеленило“.
Надлежните апелираат на совесно однесување од граѓаните, а секој кој ќе забележи било какво оштетување на јавен имот веднаш да пријави во ошштината или во полиција.
Никола Ивановски