Безбедносната ситуација во Европа мора да се реши кога ќе се заклучи прекинот на огнот во војната меѓу Русија и Украина, изјави денеска унгарскиот премиер Виктор Орбан.
Во интервју за државната радио станица Кошут, Орбан рече дека Русија се променила, станувајќи „многу силна“ на позадината на војната, додека Украина станала „многу слаба“, пренесува МТИ.
Според него, европските армии се покажале како исклучително слаби.
„Немаме ни оружје, муниција или пари за војна со Русија. Сите знаци на европска слабост станаа видливи“, нагласи унгарскиот премиер.
Како што наведе тој, поради оваа причина, Европа мора да размисли за прегрупирање и изнаоѓање решение „што ќе ја гарантира нашата безбедност“ кога ќе се позиционира во однос на САД.
Тој додаде дека тоа подразбира „сложена и долга серија“ преговори и акции во следните година или две, наведува унгарската агенција.