Општина Куманово и Управниот суд направија важен чекор кон целосна дигитализација на управно-судските постапки, со потпишување Меморандум за соработка за електронско поврзување преку софтверската платформа ЕПУС.
Меморандумот денеска го потпишаа градоначалникот на Општина Куманово, Максим Димитриевски, и претседателот на Управниот суд, Бурим Сејдини.
Со договорот се воспоставува дигитална комуникација помеѓу Вишиот и Управниот суд и јавните органи, со цел побрзо, поефикасно и поекономично водење на управно-судските постапки.
Преку платформата ЕПУС ќе се овозможи навремена и сигурна размена на акти и списи, поедноставување и забрзување на постапките, како и зголемување на правната сигурност и транспарентноста.
Дополнително, се очекува значително намалување на административните трошоци и воспоставување функционален систем за двонасочна електронска комуникација меѓу институциите.
Соработката, согласно законските прописи, предвидува размена на податоци во двете насоки преку софтверска платформа која ќе биде усогласена со постојниот CMS-систем на Судот и техничките решенија на јавниот орган, во зависност од нивната техничка подготвеност.
На настанот присуствуваа и раководителите на Одделението за информатичка технологија и Одделението за општи работи при Општина Куманово, Андријана Вукановска Цветковска и Хајредин Ибраими, кои учествуваа на обука организирана од Одделението за информатика при Управниот суд.
Со тоа, Општина Куманово и официјално стана корисник на софтверската платформа ЕПУС, што претставува уште еден чекор кон модерна, ефикасна и дигитална локална администрација.
Никола Ивановски