Повеќе од 9.000 мртви, 5,5 милиони насилно раселени во Судан и во регионот. Во исто време, повеќе од половина од населението на третата по големина земја во Африка, поточно околу 24 милиони Суданци и мигранти од сите делови на Африка во таа земја, денес имаат потреба од хуманитарна помош и заштита.
Освен тоа, неконтролирано се шират епидемии на колера, сипаници, денга треска и маларија. – Ова се драматичните хуманитарни последици од досегашната полугодишна војна во Судан, пренесоа денеска агенциите.
По тој повод Клементин Нквета-Салами, заменик специјален претставник на генералниот секретар на ОН и резидентен и хуманитарен координатор во Судан, оценува дека тоа е „најлошата хуманитарна криза во светот денес“.
Од 15 април, кога избувна конфликтот меѓу ривалската суданска армија предводена од генералот Абдел Фатах Бурхан и Силите за брза интервенција на генералот Мохамед Хамдан Дагало, населението на третата по големина земја во Африка доживува „неописливо страдање“, според Нквета-Салами.
Говорејќи на хибридна прес-конференција од Женева, Швајцарија, Нквета-Салами рече дека околу 30.000 луѓе дневно ги напуштаат своите домови во области со помалку борби или подобар пристап до основните потреби.
„Некои [бегаат] само со облеката на грб“, рече таа.
Нквета-Салами е загрижен дека кризата што сега зафаќа половина Судан „се заканува да ја зафати целата земја“.
Според неа, пристигнувањето на хуманитарна помош во Судан носи исклучителни ризици и често вклучува преговори со неколку вооружени фракции за пристап до оддалечените населби.