Специјалните известувачи на ОН ја изразија својата загриженост поради бранот напади, акти на одмазда, криминализација и санкции ширум светот против оние кои јавно изразуваат солидарност со жртвите од конфликтот меѓу Израел и Палестина, пренесува агенцијата Танјуг.
„Повиците за прекин на насилството и нападите во Газа, или за хуманитарен прекин на огнот, критиките на политиките и дејствијата на израелската влада, погрешно се поистоветуваат во премногу контексти со поддршка на тероризмот или антисемитизмот. Ова ја задушува слободата на изразување, вклучително и уметничкото изразување, и создава атмосфера на страв од учество во јавниот живот“, се наведува во соопштението објавено на веб-страницата на Високиот комесаријат за човекови права на ОН (УНХЦР).
Во него се додава дека е забележан антисемитски говор и нетолеранција кон оние кои го поддржуваат или се смета дека го поддржуваат Израел, како и оние кои изразуваат сочувство за страдањата на Израелците по нападите на Хамас на 7 октомври.
„Ова остава малку простор за умерени погледи“, се вели во соопштението.
Вознемирувачкиот тренд на забрана на пропалестинските протести
Експертите на ОН истакнаа дека уметниците, академиците, новинарите, активистите и спортистите се соочуваат со особено тешки последици и репресалии од страна на државите и приватните актери поради нивната истакната улога и видливост.
„Луѓето имаат право да изразат солидарност со жртвите на тешките прекршувања на човековите права и да бараат правда, или од едната или од другата страна или од двете“, велат тие.
Тие, исто така, истакнаа дека постои „многу вознемирувачки тренд“ да се криминализираат и етикетираат пропалестинските протести како „протести на омраза“ и да се забранат како превентивна мерка, често наведувајќи ги ризиците за националната безбедност, вклучително и ризиците поврзани со поттикнување омраза, како причината не дава оправдување засновано на докази за тоа.
Тие велат дека ваквите постапки не само што го нарушуваат правото на протест, туку се штетни и за демократијата и напорите за градење мир.