Генералното собрание на Обединетите нации ја класифицираше трансатлантската трговија со робови како „најсериозно злосторство против човештвото“ во усвоената резолуција која исто така повикува на враќање на културните артефакти во нивните земји на потекло.
Резолуцијата ја предложи Гана и ја поддржаа 123 земји.
Израел, Соединетите Американски Држави и Аргентина гласаа против.
Резолуциите на Генералното собрание на ОН не се правно обврзувачки.
Во резолуцијата се наведува дека поробувањето на Африканците и трансатлантската трговија со робови треба да се сметаат за „најсериозно злосторство против човештвото“ поради обемот, времетраењето, системската природа, бруталноста и трајните последици од злосторството, објавува германската новинска агенција ДПА.
Американскиот претставник ја критикуваше резолуцијата, велејќи дека Обединетите нации не се основани за да промовираат специфични програми или како што тој опиша – специјализирани меѓународни годишнини.
Гласањето се совпадна со Меѓународниот ден на сеќавање на жртвите на ропството и трансатлантската трговија со робови.
Помеѓу 16-ти и 19-ти век, европските колонијалисти поробувале милиони Африканци и ги депортирале во Америка и Карибите, од кои многумина умирале за време на патувањето.
Велика Британија ја укинала трговијата со робови во 1807 година, а ропството официјално било забрането во Соединетите Американски Држави во 1865 година.
Обединетите нации го забранија ропството низ целиот свет со усвојување на Универзалната декларација за човекови права во 1948 година.