Петнаесет лица загинаа во Кина, а четворица исчезнаа по бурните дождови во југозападниот дел на земјата, додека илјадници луѓе беа евакуирани од своите домови, објави во средата официјалната новинска агенција Ксинхуа.
Како резултат на обилните дождови, „15 лица загинаа, а четворица се водат како исчезнати во Чонгкинг во југозападна Кина“, се вели во извештајот во средата рано наутро, пренесе агенцијата, повикувајќи се на локалните власти.
Потврдата за постоењето на жртвите доаѓа еден ден откако метеоролошките служби предупредија за можни непогоди предизвикани од дождовите кои зафатија голем дел од центарот и југозападот на земјата, во исто време кога беа соборени температурните рекорди.
Претседателот Си Џинпинг нареди „властите на сите нивоа да дадат приоритет на обезбедувањето на безбедноста на луѓето и имотот“, додаде China News во средата.
Евакуирани 85.000 луѓе
„Си истакна дека високите функционери на сите нивоа треба да преземат водство во борбата против поплавите, да ја стават безбедноста на луѓето и имотот на прво место и да се стремат да ги минимизираат загубите“, според Нова Кина.
Колкава е штетата говори податокот дека во вторник поради дождот се урна железнички мост во Чонгкинг, провинција со 31 милион жители, јави Ксинхуа.
Во соседната провинција Сечуан, повеќе од 460.000 луѓе се погодени во различен степен од поројните дождови оваа недела, додаде агенцијата во вторникот.
Властите соопштија дека околу 85.000 луѓе се евакуирани од своите домови поради дождот, а оваа недела се очекуваат „големи поплави во планинските области“ и „можни свлечишта на места“.