Светската здравствена организација (СЗО) издаде сериозно предупредување бидејќи раните индикатори укажуваат на можноста за нова глобална епидемија на чикунгунија, слична на епидемијата од 2004 и 2005 година, кога вирусот се прошири од островите во Индискиот Океан на остатокот од светот и зарази речиси 500.000 луѓе.
Од почетокот на 2025 година, големи епидемии се регистрирани на островите Реунион, Мајот и Маврициус (источно од брегот на Африка и Мадагаскар), а СЗО проценува дека една третина од населението на Реунион е веќе заразено, изјави за АФП Дијана Рохас Алварез, технички лидер на СЗО за чикунгунија.
Чикунгунија не е широко позната болест, но е откриена и пренесена во 119 земји низ целиот свет, ставајќи 5,6 милијарди луѓе во опасност, додаде таа.
Сегашниот географски модел наликува на оној од 2004 година, а пренос на вирусот е регистриран и на Мадагаскар, Сомалија и Кенија.
Ширење на епидемијата се случува и во Јужна Азија, додека во Европа се пријавени увезени случаи, вклучувајќи локален пренос во Франција и сомнителни случаи во Италија.
Вирусот го пренесуваат комарци од видовите Aedes aegypti и Aedes albopictus, при што вториот е познат како тигрест комарец.
Климатските промени овозможуваат ширење на овие преносители кон север.
Симптомите вклучуваат треска и силна болка во зглобовите, што често се меша со денга треска или вирусот Зика.
Иако стапката на смртност е помала од 1 процент, Рохас Алварез нагласи дека кога ќе почнете да броите милиони случаи, тој еден процент може да значи илјадници смртни случаи.
Рано алармираме за земјите да можат да се подготват навреме, да детектираат и да ги зајакнат сите капацитети со цел да избегнат големи епидемии, предупреди Рохас Алварез, пренесува Dnevnik.hr.
СЗО советува употреба на репеленти и отстранување на стоечката вода од садовите како што се кофите за да се спречи размножување на комарци.