Советот на Општина Куманово утре ќе ја одржи 17. седница на која на дневен ред ќе се најдат 45 точки, меѓу кои и одлуката за прогласување на почесен граѓанин на Општина Куманово.
Согласност за девет нови привремени вработувања за потребите на општинската администрација утре ќе се бараат од советниците, но оваа точка е ставена како последна на дневниот ред.
Советниците ќе ги разгледуваат и извештаите на јавните прептријатија „Чистота и зеленило“, „Водовод“, „Куманово паркинг“ и „Пазаришта“, а воедно ќе треба да се утврдат и недвижни ствари кои треба да бидат предмети на јавно наддавање за издавање под закуп токму на претпријатието кое ја организира работата на градскиот пазар.
Пред советниците ќе се најде и програмата за Детската градинка „Ангел Шајче“, како и предлог програма за измена на Програмата за развој на спортот и рекреативните активности на граѓаните во Општина Куманово.
Формирање паралелки со под 25 ученици утре ќе треба да изгласаат советниците, а воедно ќе се утврдат и критериумите за распределба на блок дотациите за основното и средно образование за следната година.
Советниците ќе треба да се произнесат и по предлог измените за Планот на програми за развој, како и програма за уредување на градежно земјиште, изградба и одржување на комунална инфраструктура.
И буџетот ќе биде тема на расправа на советот, а советниците ќе треба да гласаат и за негови измени и дополнувања.