Израелскиот премиер Бенјамин Нетанјаху сакал да го одржи Хамас во живот за да спречи единствена палестинска држава.
Од терористичките напади на 7 октомври, Израел беше сведок на слабостите на тој план.
Во конфликтот меѓу Израел и Палестинците, премиерот Бенјамин Нетанјаху се обидува да го зачува статус квото по секоја цена – и покрај неговиот познат говор на Универзитетот Бар Илан во 2009 година, кога начелно се согласи за формирање на палестинска држава.
Потезите на Нетанјаху покажуваат дека тој и неговите влади се повеќе заинтересирани за одржување на внатрешниот палестински конфликт меѓу Хамас и Палестинската ослободителна организација (ПЛО), дури и по цена да го одржат Хамас во живот.
Хамас е милитантна исламистичка група која државата Израел сака да ја елиминира.
Германија, ЕУ, САД и некои арапски земји го класифицираат Хамас како терористичка организација.
Според десничарската веб-страница Мида, Нетанјаху им рекол на своите партиски претставници во 2019 година дека мора да му се дозволи на Хамас да добива пари од Катар, бидејќи тоа е клучен начин да се спречи палестинска држава.
„Тоа е дел од нашата стратегија: да се поттикне поделбата меѓу Палестинците во Газа и Западниот Брег“, рече тој.
Во последниве години, голем дел од израелското општество беше рамнодушен кон тактиката на својот премиер. Но, сè се промени на 7 октомври.
Промена на концептот: потребни се различни решенија
Еден од најчестите изрази користени по терористичките напади на Хамас е „шинуи концепзија“, промена на концептот.
Луѓето очекуваат различни решенија од оние што ги нудат политичарите од двете страни на спектарот. А Нетанјаху досега не понуди ново решение.
Дополнително, мора да се каже дека голем дел од израелското општество не верува дека воопшто има решение, како што истакна американскиот министер за надворешни работи, Ентони Блинкен.
Либералните и левоориентираните Израелци бараат избори – бараат смена на Нетанјаху.
Неговата влада, во која има екстремни десничари, се обидува да ја искористи војната за повторно воспоставување на израелски населби од кои луѓето беа евакуирани кога Израел се повлече од Појасот Газа во 2005 година.
Самиот Нетанјаху во неколку наврати изјави дека Израел нема намера да ги обнови тие населби.
Но, неговите коалициски партнери, предводени од десничарскиот екстремист, министерот за национална безбедност Итамар Бен Гвир, ги обиколуваат телевизиските студија и бараат таканаречено „доброволно иселување“ на Палестинците од Појасот Газа.
Нетанјаху не ја контролира сопствената влада
Подемот на Бен Гвир, исто така, покажува дека Нетанјаху ја изгубил контролата врз сопствениот кабинет.
Претходно, сите политички партии – вклучително и Ликуд на Нетанјаху – јасно ги отфрлија радикалните елементи од израелската десница.
И тогаш Нетанјаху јавно го поддржа Бен Гвир, најпознатиот екстремно десничар, за да си обезбеди сопствен политички опстанок.
Така, тој му даде политички легитимитет на човек кој беше законски осуден за поддршка на терористичка група.
Анкетите велат дека поддршката за Нетанјаху паѓа, додека екстремната партија Еврејска моќ предводена од Бен Гвир најверојатно ќе освои уште повеќе места во парламентот, од сегашните шест.
Што и да се случи – израелското општество по 7 октомври станува многу поинакво отколку што беше во политичка и во секоја друга смисла.
Во овој контекст, тие ќе ги оценат најновите најави на Нетанјаху дека Израел мора да изврши безбедносна контрола над Газа кога ќе заврши војната.
Местото на Нетанјаху во историјата ќе се определи со одговорите на две прашања: дали Хамас се уште е закана за Израел и дали заложниците, кои се уште се во рацете на Хамас, ќе се вратат дома живи и здрави?
Нетанјаху е лидер со најдолг стаж во Израел и честопати велеше дека сака да биде запаметен како „бранител на Израел“.
Но, ако неговата влада не ги постигне целите за кои јавно се залага, неговото наследство ќе биде тоа што ја започна првата војна што земјата ја загуби.