Израелскиот премиер Бенјамин Нетанјаху се надева дека ќе се сретне со претседателот Доналд Трамп во Вашингтон веќе следната недела, изјавија двајца американски претставници запознаени со прелиминарниот план за патување.
Доколку посетата се случи во таа временска рамка, Нетанјаху би можел да биде првиот странски лидер што ќе се сретне со Трамп во Белата куќа од неговата инаугурација минатата недела.
Официјалните лица, кои сакаа да останат анонимни, бидејќи планирањето е сè уште пробно, рекоа дека деталите може да се договорат кога специјалниот пратеник на Трамп за Блискиот Исток, Стив Виткоф, ќе отпатува во Израел оваа недела на разговори со Нетанјаху и други израелски претставници.
Трамп ја спомена претстојната посета во разговор со новинарите на бродот Ер Форс 1, но не даде детали.
– Ќе разговарам со Нетанјаху во не така далечна иднина – рече тој.
Плановите на Нетанјаху прв ги објави Аксиос.
Портпаролот на Нетанјаху, Омер Достри, на социјалната мрежа Х, објави дека израелскиот лидер се уште не добил официјална покана за Белата куќа.
Сепак, израелски функционер рече дека Нетанјаху се очекува да оди во Белата куќа во февруари, но не наведе точен датум.
Службеникот побара да остане анонимен во очекување на официјалното соопштение.
Виткоф, кој беше присутен на церемонијата на отворањето на синагогата во Њујорк, рече дека ќе отпатува во Израел во среда за да продолжи да се фокусира на договорот за прекин на огнот меѓу Израел и Хамас.
– Договорот мора да го спроведеме на правилен начин. Важно е да се исполни договорот. Тоа беше првиот чекор, но без соодветна имплементација нема да го направиме како што треба – ќе имаме разгорување, а тоа не е добро. Ќе го следиме – рече тој.
Американските власти рекоа дека Виткоф е особено заинтересиран за унапредување на имплементацијата и ослободување на Американците и другите кои сè уште се заложници од Хамас, како и за зајакнување на кревкиот прекин на огнот меѓу Израел и Хезболах во Либан, пренесува АП.