Израелскиот премиер Бенјамин Нетанјаху размислува за проширување на воената операција и целосна окупација на Појасот Газа, објави израелскиот Канал 12, повикувајќи се на висок функционер од кабинетот на Нетанјаху.
Според медиумите, во наредните денови, Нетанјаху треба да се консултира со членовите на кабинетот и военото раководство за да ја добие нивната поддршка за оваа одлука.
Новинскиот портал Ynetnews.com ја пренесува изјавата на висок извор близок до премиерот:
„Коцката е фрлена – одиме кон целосна окупација на Газа“.
Нетанјаху претходно во текот на денот објави дека ќе издаде нови директиви оваа недела во врска со продолжувањето на војната во Газа.
Во видео обраќање објавено еден ден претходно, израелскиот премиер рече дека Хамас одбива да прифати договорено решение.
Екстремната десница долго време бара окупација на Газа
Преговорите меѓу Израел и Хамас, со посредство на трети страни, за прекин на огнот и ослободување на заложниците, траат со месеци без резултати.
Израелските сили моментално контролираат околу 75% од Газа.
Израелските одбранбени сили (ИДФ) постојано изразуваат противење на целосна окупација, предупредувајќи дека уништувањето на сите тунели и бункери на Хамас може да потрае со години, пишува „Тајмс оф Израел“.
Воените претставници, исто така, предупредуваат дека тоталната офанзива може директно да ги загрози животите на заложниците, бидејќи постојат стравувања дека Хамас би можел да ги убие штом се приближат израелските трупи.
И покрај овие предупредувања, според медиумите, Нетанјаху е подготвен да го преземе тој ризик.
„Ќе има и операции во областите каде што се заложниците“, изјавил функционер за Ynetnews.com.
Досега, главно крајно десничарските министри во владата на Нетанјаху се залагаа за целосна окупација на Газа. Сепак, се чини дека сега самиот премиер се наклонува во таа насока.