Израелскиот премиер Бенјамин Нетанјаху во неделата изјави дека фазата на „интензивни“ борби против палестинскиот Хамас во Рафа е „при крај“, но дека војната ќе продолжи се додека Хамас повеќе не го контролира Појасот Газа.
„Наскоро ќе заврши интензивната фаза од борбата против Хамас. Ова не значи дека војната завршува, но војната во нејзината интензивна фаза наскоро ќе заврши во Рафах“, рече Нетанјаху во интервју за израелскиот канал 14.
„Не сакам да ја прекинам војната и да го оставам Хамас како што е“, рече тој.
Кога ќе заврши интензивната фаза во Газа, Израел ќе може да распореди дел од своите сили на северната граница со Либан, каде што се интензивираат борбите со Хезболах.
„По завршувањето на интензивната фаза, ќе можеме да прераспределиме некои сили кон север, а тоа ќе го направиме, главно за одбранбени цели, но и за враќање на (раселените) жители во нивните домови“, додаде премиерот, за кого ова е прво интервју за израелска телевизија од почетокот на војната против Хамас на 7 октомври.
„Ако е можно, тоа ќе го направиме дипломатски. Ако не, ќе го направиме на друг начин. Но, ќе ги вратиме (жителите) во нивните домови“, нагласи тој.
Многу израелски градови долж границата со Либан се евакуирани поради борбите.
Нетанјаху, исто така, рече дека нема да прифати никаков „делумен“ договор.
„Целта е да се вратат заложниците и да се искорени режимот на Хамас во Газа“, додаде тој.
Нетанјаху повторно ја отфрли идејата палестинската управа да управува со Газа наместо Хамас.