Израелскиот премиер Бенјамин Нетанјаху во средата изјави дека сè уште планира да го посети Њујорк и покрај заканите од новоизбраниот градоначалник Зохран Мамдани дека ќе го уапси според налогот на Меѓународниот кривичен суд (МКС).
– Да, ќе дојдам во Њујорк – изјави Нетанјаху во виртуелно интервју на форумот Dealbook на New York Times.
На прашањето дали ќе се обиде да разговара со Мамдани, Нетанјаху одговори: „Ако се предомисли и каже дека имаме право да постоиме, тоа би било добар почеток за разговор“.
Мамдани, демократски социјалист кој стана првиот муслимански и првиот јужноазиски градоначалник на Њујорк, постојано изјавуваше дека го поддржува правото на Израел да постои.
Но, тој се воздржува од тврдењето дека Израел има право да биде еврејска држава, велејќи дека ниту една држава не треба да има „хиерархија на државјанство“ заснована на религија или други фактори.
Мамдани вети дека ќе ја испрати њујоршката полиција да ги спроведе налозите за апсење на водачите кои ги бара Меѓународниот кривичен суд, вклучително и Нетанјаху или рускиот претседател Владимир Путин.
МКС со седиште во Хаг минатата година соопшти дека има разумни основи да верува дека Нетанјаху е одговорен за наводните воени злосторства и злосторства против човештвото во немилосрдната офанзива на Израел врз Газа.
Израел изрази гнев поради обвинувањата. Израел, САД и Русија се меѓу државите кои одбија да се приклучат на МКС.
И покрај изјавите на Мамдани, апсењето на Нетанјаху се смета за неверојатно, а прашање е дали новоизбраниот градоначалник воопшто има такви овластувања.
Федералната влада управува со имиграцијата, а администрацијата на претседателот Доналд Трамп силно го бранеше Израел, вклучително и наметнување санкции за судиите и обвинителите на МКС.
Њујорк е дом на најголемата еврејска популација надвор од Израел, како и Обединетите нации, каде Нетанјаху редовно присуствува на годишното Генерално собрание.
Според договорот за земјата домаќин, од САД се бара да издаваат визи за официјални работи на ОН, иако во септември администрацијата на Трамп не му дозволи влез на палестинскиот лидер Махмуд Абас.