Израелскиот премиер Бенјамин Нетанјаху му се обрати на иранскиот народ, велејќи му дека имаат „можност еднаш во генерација“ да го соборат тамошниот режим.
Тој рече дека израелските напади ќе им помогнат „да се ослободат од тиранијата“.
„Излезете масовно на улиците и завршете ја работата“, рече тој.
„Крајно време е да се здружиме и да се обединиме во историска мисија“, додаде Нетанјаху.
Нетанјаху исто така тврдеше дека „има многу знаци дека тиранинот Хамнеи повеќе не е жив“.
Сепак, тој не понуди никаков доказ за тоа тврдење.
Тој најави дека операцијата ќе продолжи се додека е потребно и повика на трпение.
Нетанјаху рече дека Израел има „сојуз за мир и сојуз за војна“, додавајќи дека оваа војна на крајот ќе доведе до „вистински мир“.
„Ова е можност да се направи нешто. Не седете со скрстени раце, затоа што доаѓа моментот кога од вас ќе биде побарано масовно да излезете на улица. Мора да ја завршите оваа работа, мора да го соборите и искорените овој режим“, заклучи тој.
Иран: Врховниот лидер и претседател живи и здрави по нападот
Иранското Министерство за надворешни работи објави претходно дека врховниот лидер и претседателот на земјата се живи и здрави, откако се појавија информации за напад на комплекс во Техеран.
„Сите се безбедни и неповредени“, изјави потоа портпаролот на Министерството.
„Точно е, некои од нашите команданти загинаа како маченици во овој терористички чин на агресија. Но, она што е важно е иранскиот народ и нашите храбри вооружени сили да ги преземат сите неопходни мерки за да го одбранат Иран на најсилен можен начин“.
Претходно, министерот за надворешни работи за американската телевизиска мрежа NBC News изјави дека врховниот лидер е, „колку што знае“, жив.